Nagapadayon ang monitoring sang Criminal Investigation and Detection Group-Bacolod sa apat ka mga persona nga may yara sang address sa Negros Occidental kag nalakip sa anom ka ginakabig nga wanted angot sa natabo nga pagka-missing sang mga bulangero sa bahin sang Manila.
Sa interview sang Bombo Radyo Bacolod kay Police Major Chris Arthemius Devaras, pinuno sang Criminal Investigation and Detection Group (CIDG)-Bacolod, ang pagpangita sang apat ka mga wanted persons ang ginpapanaog sang national headquarters sang CIDG sa Manila kag may yara naman sila sang kopya sang mga warrant of arrest sang mga wanted persons nga gin-issue sang Branch 40 sang Regional Trial Court sa Manila.
Suno kay Devaras, nagapadayon ang ila monitoring apang wala pa sila sang nabaton nga impormasyon nga nakapauli na sa ciudad ukon probinsya sang Negros Occidental ang apat.
Nagalaom man ini nga ang mga pumuluyo ang makahatag man sang impormasyon nga makatudlo sa apat ka mga wanted agud maaresto ang mga ini.
Wala man sang impormasyon ang CIDG-Bacolod kun ang apat ang nagatrabaho kay Atong Ang bangud indi man sila ang lead agency nga nagauyat sang kaso kag nagabulig lamang sila sa pagmonitor sa apat sa posible nga pag-aresto sa mga ini.
Suno kay Devaras, kun sin-o man ang may impormasyon nga may kaangtanan sa apat, mahimo man sila makahatag sini sa mga otoridad paagi sa contact numbers: sa Smart 0921-7228209 kag sa Globe-09453346398 ukon sa 433 331 97 landline kag 0948-0803598.
Ginpahayag man sini nga indi dapat magkahadlok nga maghatag sang impormasyon bangud hatagan man ang mga ini sang nagakaigo nga seguridad.
