Arestado ang apat ka mga suspetsado nga nagkastigo sa 11 anyos nga bata nga babayi sa ciudad sang Talisay.
Sa interview sang Bombo Radyo Bacolod kay Police Major Karena Tenerife Onio, deputy chief of Police sang Talisay City Police Station, naaresto ang iloy kag ang isa ka tiyo sang bata kahapon sang aga, kag sa hot pursuit operation sang Talisay Police Station, naaresto naman sang hapon ang isa pa gid sini ka tiyo kag iya live-in partner.
Suno diri, nagapanindugan ang iloy nga dungol ang bata amo nga nahimo sini nila nga sakiton ang bata.
Gin-ako man sang mga suspek nga madugay na nila nga ginasakit ang bata basta kun ini ang nagapasaway kasubong man nga gin-ako sang iloy nga ginasugo niya ang duha niya ka utod nga lalaki kag ang asawa sang isa sa iya ka utod nga sakiton ang bata.
Nahibaluan naman nga ginlampusan sang martilyo kag tubo ang kamot sang bata.
Sa karun, estable na ang kondisyon sang bata nga yara sa Teresita Lopez Jalandoni Provincial Hospital.
Samtang, ang apat naman ka mga suspek ang yara na sa kustodiya sang Talisay City Police Station kag ginaproseso na ang mga dokumento sa pagpasaka sang kaso sa Lunes batok sa apat.
Mensahe ni Onio, ang bata natural lamang kun kaisa nga magpasaway apang indi ini rason nga kastiguhon ini.
