Igafile na ang kaso batok sa apat ka ginatudlo mga suspetsado sa pagluthang-patay sa maglive-in partner nga caretaker sang duta sa Purok Calango, Barangay Iglau-an, banwa sang Murcia, Negros Occidental sang Nobyembre 17.
Madumduman nga ang mga biktima ang ginkilala nga sanday Feliciano Leagoso, 45 anyos, residente sang Brgy. Abo-abo, banwa sang Murcia kag Susan Hiligawan, residente sang Brgy 16, ciudad sang Victorias.
Si Leagoso ang nasapwan nga yara sa gwa sang ila balay nga may igo sang bala sa ulo kun sa diin halos naluk-ab ang bagul sini samtang si Hiligawan naman ang nasapwan sa sulod sang ila hayob-hayob kag may igo sang bala sa nagkalain-lain nga bahin sang lawas.
Sa interview sang Bombo Radyo Bacolod kay Police Major Marc Joel Reclamado, hepe sa Murcia Municipal Police Station, may witness nga nagtuhaw kag nagsugid sa tag-iya sang duta nga ginabantayan sang maglive-in kag ginsaysay sini nga nakita niya ang natabo nga pagpatay sa mga biktima.
Ang witness ang nagpadulong naman sa Murcia Municipal Police Station kag nakuhaan na sang mga ini sang affidavit.
May apat ka mga ginmensyonar nga pangalan sang suspetsado ang nasambitan nga witness.
Sa karun, ginapreparar na lamang ang tanan nga mga dokumento nga kinahanglan, kag ginalantaw nga mafile ang kaso sa prosecutors’ office subong nga semana.
