Apat ka katapos sang New People’s Army ang patay sa engkwentro batok sa tropa sang gobyerno sa Brgy. Santol, banwa sang Binalbagan, Negros Occidental kaina sang aga.
Sa interview sang Bombo Radyo Bacolod kay 303rd commander Brigadier General Incocencio Pasaporte, may yara sang nabaton nga impormasyon ang katapo sang 94th Infantry Battalion kun may yara sang presensya sang armado nga grupo sa lugar nga nagatigayon sang extortion.
Suno kay Pasaporte, nasugata sang tropa sang gobyerno ang armado nga grupo kag nagluntad ang engkwentro.
Kaupod sang 94th IB nga naengkwentro sang NPA ang mga kapulisan sa banwa sang Binalbagan.
Ginabanta nga napulo tubtob 15 ka mga miyembro sang NPA ang naengkwentro sang tropa sang gobyerno kun sa diin ang kaupod sang mga ini ang nagwithdraw.
Apat ka miyembro sang NPA ang napatay nga ginalakipan sang tatlo ka lalaki kag isa ka babayi.
Apang wala pa ang mga otoridad sang identity sang mga napatay nga miyembro sang NPA.
Suno kay Pasaporte, narekober sa natabuan sang engkwentro ang apat ka armas luthang nga amu ang isa ka M16 with M203, M16, M14 kag calibre 45 ,mga subersibo nga dokumento, kag personal nga gamit.
Nagapadayon sa karun ang hot pursuit operations sang tropa sa encounter site.
Suno kay Pasaporte, wala naman sang nasamaran sa bahin sang tropa sang gobyerno.
Ginalantaw naman nga may yara nga nasamaran sa bahin sang NPA matapos nga may yara sang nakita nga blood stains sa lugar.
Suno diri, mabaskog ang ulan sa lugar gani ginalantaw nga ini ang mahimo makapadelay man sa pagpangita sang tropa sa mga nagpalagyo nga kaupod sang mga napatay.
Nakasaka naman sa lugar ang katapo sang scene of the crime operation (SOCO) sang Philippine National Police (PNP) agud magproseso ang encounter kasunod sang pagpakig-angot sini kay Negros Occidental Police Provincial Office (NOCPPO) provincial director Police Col. Leo Pamitan.
Sa tion nga maprocess na ang encounter site, mapapanaog na ang mga bangkay, matumod kag mapahibalo man ang tagsa nila ka mga pamilya kag mahatagan sang nagakaigo nga paglubong.
Dako man ang tsansa nga matumod ang mga ini sang 19 ka mga nagsurender nga katapo sang NPA sang tinalikdan nga semana.
Suno man kay Pasaporte ang mga grupo ang imbulbado man sa pagpatay sang isa ka persona sa Barangay Bi-ao, Binalbagan sang Pebrero kag nag-ambush sa katapo sang Binalbagan Municipal Police Station.
Nagpanugyan man si Pasaporte sa mga nagapabilin sa sulod sang makawala nga grupo nga magsurrender na tropa sang gobyerno agud malikawan ang kaangay nga insidente.
Samtang, nagluntad man ang engkwentro sa tunga sang 79th Infantry Battalion kag New People’s Army (NPA) sa Barangay Marcelo sa banwa sang Calatrava kaina sang udto.
Santo sa inisyal nga report, may yara nga nadakpan nga isa ka katapo sang NPA.
