Nakilala na ang apat ka mga miyembro sang New People’s Army nga napatay kadungan sang engkwentro batok sa mga suldado sa Sitio Amilis, Barangay Santol, Binalbagan, Negros Occidental kahapon sang aga.
Sa interview sang Bombo Radyo kay Brigadier Gen. Inocencio Pasaporte, commander sang 303rd Infantry Brigade, ang mga napatay amo sanday Roel Sagon alias “Berio”, squad leader sang Squad 3 sang Central Negros 2 – Komiteng Rehiyon Negros (CN2-KRN), residente sang Brgy Buenavista, Himamaylan City, kag ginabanta nga nagaedad sang 30 anyos; Rowel Udtuhan alias “Jing -jing/Caloy “, assistant squad leader sang Squad III, kag residente sang Brgy San Antonio, Himamaylan City.
Isa man sa mga napatay amo si Alden Rodriguez alias” Bigboy “, miyembro sang Squad III kag residente sang Brgy. Bantolinao, Manjuyod, Negros Oriental kag nagaedad pa lang sang 20 anyos.
Ang babayi naman nga napatay amo si Nika Ledesma alias “Sarah Jane ukon Chai”, 20 years old, political guide sang Squad III kag residente sang Cebu City.
Suno kay Pasaporte, ang mga nagkalamatay ang ginkilala mismo sang mga kaupod nila sadto sa hublag apang nagdesisyon na nga magbalik sa sabak sang gobyerno.
Nagpanugyan naman si Pasaporte sa mga himata sang mga biktima nga makig-angot sa Binalbagan Municipal Police Station agud nga maclaim ang ila bangkay.
