Wala gihapon sang identity ang apat ka mga miyembro sang New People’s Army nga napatay sa nagluntad nga series of encounters sa tunga sang New People’s Army kag tropa sang gobyerno sa Barangay Carabalan, syudad sang Himamaylan, Negros Occidental kahapon sang aga.
Madumduman nga kapin 20 ka mga persona ang naengkwentro sang tropa sang gobyerno nga nagdugay sang 20 minutos.
Sa interview sang Bombo Radyo kay Col. Orlando Edralin, commander sang 303rd Infantry Brigade sang Philippine Army, wala sa gihapon sang identity kag wala pa man naclaim sang ila pamilya ang apat ka mga miyembro sang NPA nga napatay sa engkwentro kahapon.
Suno diri, yara ang mga bangkay sa funeral homes.
Nagapati man ini nga magluwas sa apat ka mga nagkalamatay, may mga rebelde man nga napilasan bangud nagapalagyo na ang mga ini, may mga ginaguyod sila nga pilason nga mga kaupdanan kag may mga blood stains sa encounter site.
Nagapasalamat ini sa mga pumuluyo nga nagacoordinate kag nagahatag sa ila sang impormasyon tuhoy sa mga rebelde.
Suno kay Edralin, ini ang nagapakita lamang nga natak-an na ang mga pumuluyo sa presensya, extortion kag pagpanghadlok sang makawala nga grupo.
Nagpasalig man ini nga ila himuon ang tanan agud mapabilin ang kalinong sa lugar.
Nagapanawagan ang 303rd IB commander sa mga katapo sang NPA nga magbalik na sa sabak sang gobyerno kag indi kinahanglan nga mag-inawag bangud madamo pa sang iban nga paagi agud ila mapabutyag ang ila mga sentimento sa gobyerno
Samtang, nagaamat-amat na balik sa ila mga puluy-an ang mga evacuees nga nagtinir sa Carabalan Gym kahapon.
Suno kay Edralin, 181 ka pamilya kag 651 ka mga indibidwal ang nag-evacuate sa Carabalan Gym.
Suno sa iya, may pila na nga nag-una balik sa ila mga puluy-an kagab-i kag subong nagaamat-amat naman balik sa ila mga balay ang evacuees.
Nagapasalamat ini sa local government unit sang Himamaylan sa madasig nga tikang kag bulig sa mga pumuluyo.
Suno diri, naghatag ang ciudad sang food stocks kag hygiene kits.
Nagpasalig man ini nga ila imintinar ang seguridad sa puluy-an sang mga evacuees kag nagapadayon man ang bulig sang gobyerno.
