May apat ka pamilya nga gin-evacuate kasunod sang nagluntad nga pagbaha sa Barangay Sampinit, Bago City.
Ini resulta sang madamol nga mga pag-ulan dala sang Southwest Monsoon ukon Hangin Habagat nga ginpabaskog pa sang Severe Tropical Storm ‘BEBINCA’.
Sa interview sang Bombo Radyo Bacolod kay Punong Barangay Daniel Famoso, ang apat ka pamilya ang temporaryo nga gindala sa Bago City Coliseum nga nagserbe nga evacuation center.
Paathag sang Punong Barangay nga apat lamang ka pamilya ang gin-evacuate bangod sila ang nahamtang sa nanubuan nga lugar.
Samtang ang iban naman nga balay sa palibot nila ang matag-as gani wala gin-evacuate.
Suno kay Famoso, padayun ang ila monitoring sa apat ka Purok nga ginabaha nga ginalakipan sang Purok Kamunsil, Mabinuligon, Maghili-ugyon 1 kag Maghili-ugyon 2.
Ang mga nasambit nga purok man ang masami nga ginabaha kun may-ara sang bagyo ukon madamol nag mga pag-ulan.
