Apat ka panibag-o nga positibo nga kaso sang COVID-19 ang narecord sa probinsya sang Negros Occidental, samtang isa naman ang nadugang sa cases sang Bacolod.
Ang panibag-o nga nagpositibo sa probinsya ang ginalakipan sang 30 anyos nga babyi, residente sa banwa sang Isabela, Negros Occidental, isa ka 25 anyos nga lalaki, residente sa San Carlos City, Negros Occidental, 36 anyos nga lalaki, residente sa La Carlota City, Negros Occidental kag isa ka 43 anyos nga lalaki, nga residente sa banwa sang Cauayan, Negros Occidental.
Ang mga nagpositibo sa probinsya ang lunsay mga locally stranded individual (LSI).
Samtang ang panibag-o naman nga nadugang sa tala sang COVID-19 positive sa siyudad sang Bacolod ang ginkilala kay Bacolod City Patient No. 53, isa ka 33 anyos nga lalaki kag residente sa Barangay Mansilingan, Bacolod City.
Ang pasyente ang isa ka LSI nga nagikan sa Manila kag nag-abot sa siyudad sadtong Hunyo 28 kag gin RT-PCR test sa kasubong nga adlaw.
Ginpaidalum naman ini sa istrikto nga home quarantine kag gilayon nga gintransfer sa
Quarantine Facility sang maggwa ang positibo nga resulta kahapon.
Asymptomatic naman ang status sang nasambit nga pasyente.
Sa karon, nagdangat na sa 171 ang COVID-19 cases sa probinsya sang Negros Occidental samtang nagapabilin naman sa 53 ang siyudad sang Bacolod.
