Arestado ang duha ka lalaki kag duha ka babayi sa buy bust operation nga ginpatigayon sang Police Station 8 sa Purok 3 Bayad, Magsungay, Barangay Singcang Airport, Bacolod City.
Ang mga suspetsado amo sanday Brian Samodio, 38 anyos; Mary Joy Lopez, 37 anyos; Kim Edgar Dogaojo, 36 anyos; kag Jodelyn Gamboa, lunsay wala sang trabaho kag mga residente sang nasambit nga barangay.
Sa interview sang Bombo Radyo kay Police Captain Melvin Mercado, hepe sang Police Station 8, ang subject sa buy bust amo sanday Samodio kag Lopez nga nagabaligya sang illegal nga druga.
Suno diri, si Samodio ang masami magmitlang sang pangalan sang mga persona nga imbulbado sa illegal nga druga, gani siya ginmonitor kag nakumpirma nga siya nagabaligya sang illegal nga druga.
Samtang si Lopez naman ang may anay live-in partner nga napreso bangod sa kaangtanan man sa illegal nga druga.
Nakumpiskar sang kapulisan ang kapin napulo ka gramo sang illegal nga druga nga ginabanta nagabalor sang P68,000.
Sa karun ang apat ka suspetsado yara sa kustodiya sang Police Station 8 nga magapangatubang sang nagakaangay nga kaso.
