Apat ka mga persona ang nadakop sa drug buybust operation sa Bugtong Bukid, Barangay Buluangan, San Carlos City, Negros Occidental.
Suno kay P/Lt Roby Aurita, deputy chief sa San Carlos City Police Station, ang mga suspetsado ang gikilala kanday Roger Cajuelan, 40 anyos, residente sa Sitio Tuburan, Barangay Buluangan; Angelo Escuadro, 32 anyos, residente sa Sitio Lamesa, Baranga Buluangan; Jose Rodjen Bacurnay kag tiyo sini nga si John Marco Bacurnay, lunsay 34 anyos kag residente sa Sitio Trozo, Barangay Buluangan sa syudad sang San Carlos.
Suno kay Aurita, nakuha sa mga suspetsado ang 14 ka sachet sang suspected shabu isa ka bundle sang empty sachet, itom nga sling bag, cash proceeds nga P980 kag P1,000 nga buybust money.
Ang suspected shabu ang ginabanta nagabug-at sang 15 gramos kag nagabalor P102,000.
Ginpahayag ni Aurita nga magluwas sa nakumpiskar nga iligal nga droga, nakuhaan man sang isa ka unit sang cal. 38 revolver ang subject nga si Cajuelan, kasubong man ang anom ka live ammunition kag isa ka itom nga inside holster.
Pahayag sang deputy chief nga wala ini sang kaso sa San Carlos City Police Station apang si Cajuelan ang surenderee sa Oplan Tokhang.
Sa mga nadakop si John Marco Bacurnay lang ang may-anay kaso maykaangatanan man sa iligal nga droga.
Ini ang nadakop sa buybust operation sang Setyembre 21, 2018 ka San Juan Baybay, Barangay 6, San Carlos City apang nakagwa man matapos maka-avail sang Plea Bargaining Agrrement.
Si Escuadro naman ang nahibaluan nga may-utod nga yara man sa listahan sang mga ginamonitor nga drug personality sang San Carlos City Police Station.
Suno kay Aurita, so Escuadro ang nagserbe nga look-out samtang ang tatlo ang mismo nagpatigayon sang pagbaligya.
Ginpasalamatan man sang deputy chief ang mga pumuluyo sa lugar bangod sa padayun nga paghatag sang impormasyon sa social media kasubong man sa ila nga hotline.
Ang mga suspetsado ang natalana nga pasakaan sang kaso maykaangtanan sa bayolasyon sa Republic Act 9165 ukon Comprehensive Dangerous Drugs Act of 2002 samtang si Cajuelan ang mangatubang sang dugang nga kaso sa pagbayolar sa RA 10591 ukon Comprehensive Firearms and Ammunition Regulation Act kag Comelec Gun ban.
