Arestado ang apat ka persona sa drug buybust operation nga ginpatigayon sa Purok 6, Barangay 1, Kabankalan City, Negros Occidental.
Ang mga naaresto ang ginalakipan nanday Sonny Jane Villajera alias Tomboy, 27 anyos kag Jesmar Mahinay alias Aming, 36 anyos, lunsay residente sa lugar kag amo ang subject sa buybust.
Kalakip man sa naaresto sanday Peter Sario, 28 anyos, residente man sa lugar kag Anton Hechanova, 18 anyos, nga residente naman sa Purok 3, Barangay 1, Kabankalan City.
Narecover sa mga suspect ang 22 ka sachet sang suspected shabu kalakip na ang buybust item, pila ka drug paraphernalia kag mga non-drug items.
Ang suspected shabu ang ginabanta nagabug-at sang 25 gramos kag may standard drug price nga P170,000.
Sa interview sang Bombo Radyo Bacolod kay Police Captain Sammy Gasataya, deputy chief of police sang Kabankalan City Police Station, ginpasanyog pa sang mga ini ang anti-illegal drug operations karun nga ginasaulog ang Sinulog Festival 2025.
Kalakip na sa resulta sini ang pagka-aresto sang apat ka street level individual.
Suno diri, madugay naman nga ginamonitor ang duha ka subject sa buybust.
Aminado si Gasataya nga sa tion sang kaangay nga mga aktibidad, nagadagsa man ang illegal drug trade.
Pinaagi sa pagpasanyog sang anti-drug buybust operations, mapahagan-hagan man ang paglapta sang illegal nga droga kag ang krimen may kaangtanan sa illegal drugs.
Pasalig sini nga pasanyugon pa nila ang monitoring sa mga drug personalities sa ila nga area partikular na karun nga ginasaulog ang Sinulog Festival 2025, nga obligasyon sang mga ini bilang protektor kag tagapatuman sang layi.
