Apat ang nagtaliwan sa duha ka Wing Van nga nagkalayo matapos nga nagbunggu-anay sa Crossing Tabao, Valladolid, Negros Occidental kagab-i.
Ginpanawagan sa mga nagalabay sa nasambit nga area nga temporaryo nga indi malabayan ang dalan bangod yara sa tunga sang kalsada ang duha ka wing van nga nag-head on collision.
Gilayon naman nga ginbululigan sang mga bombero sang banwa kag mga kalapit nga ciudad agud nga maapular ang sunog.
Nahibaluan nga naipit ang mga driver sang duha ka wing van kaupod sang ila mga helper gani wala ang mga ini makaguha.
Nahibaluan nga nagapangayo pa kuntani ang mga ini sang tabang apang wala na marescue sa tuman ka baskog sang kalayo.
Wala pa makilala ang mga pangalan sang mga biktima bangod kaupod man nga nasunog ang mga dukumento sa salakyan.
Ginatinguhaan naman nga makontak ang kompanya nga nagapanag-iya sang salakyan pinaaga sa plaka agud nga makilala ang mga persona nga nasunog.
Ang isa ka wing van ang nahibaluan nga nagikan sa Dumaguete kag magabyahe na padulong sa Manila.
Wala naman sang unod ang nasambit nga wing van apang wala naman nahibaluan kun ano ang unod sang isa pa ka salakyan.
Sa karun, sarang lang nga malabayan sang mga motorsiklo, tricycle kag mga auto ang dalan apang indi pa makalabay ang mga dalagko nga salakyan.
