Ginkumpirmar sang hepe sang Bago City Police Station nga boluntaryo nga nagpaidalom sa DNA testing ang apat ka mga persons of interest sa kamatayon sang 14-anyos nga babayi nga nasapwan patay sa kampo sang tubo sa Hacienda Phoenix, Barangay Binubuhan nagligad nga Enero 6.
Sa interview sang Bombo Radyo Bacolod kay Police Major John Joel Batusbatusan, ginpahayag sini nga sang nagligad nga Sabado, boluntaryo nga nag-submit sang ila kaugalingon ang apat ka mga persona para sa DNA testing.
Magluwas diri, ginpaidalom man sa blood swabbing ang bloodstain nga na-trace sang kapulisan sa crime scene.
Sa karon, ila nalang ginahulat ang resulta nagikan sa crime laboratory.
Dugang pa ni Batusbatusan, may yara naman sang tatlo ka mga witness sa kaso nga naghatag naman sang ila affidavit sa kapulisan.
Ginkumpirmar man sang hepe nga nagtukod na sila sang Special Investigation Task Group-police station level ang Bago PNP agud matutukan ang kaso ni Jemia Rose Oliveros.
Madumduman nga naglakat sang Enero 1 sang udto ang biktima agud kuhaon ang cellphone nga ginpacharge sa balay sang abyan sang iya amay, duha ka kilometro nagikan sa ila balay apang wala na nakaabot diri ang grade 8 student kag wala naman siya nakapauli.
Nasapwan na lamang si Oliveros nga may busal sa baba, ginpasaka ang iya nga bayo kag bra, wala na sang shorts kag panty kag madamo sang lagob.
Wala na ang iban nga tudlo si Oliveros samtang nakakas naman ang iya mga kuko sa iban nga tudlo sa kamot.
Magluwas diri, buka ang ulo sang biktima apang wala sang nakit-an nga pilas tuga sang pagbuno.
