Apat ka platoon ukon duha ka company sang police ang ginhanda sang Bacolod City Police Office (BCPO) para sa pagpabilin sang seguridad kadungan sang pagpatigayon sang State of the Nation Address ni Presidente Rodrigo Duterte sa Lunes.
Sa interview sang Bombo Radyo Bacolod kay BCPO spokesperson Police Lt. Col. Ariel Pico, ginpahayag sini nga nakafull alert status ang police sumugod sa Domingo sang hapon kag kanselado na ang mga filed leave sang mga kapulisan magluwas sa sick leave.
Gindiscourage naman ni Pico ang mga nagaplano nga magprotesta nga indi na lamang pagpadayunon ang hublag protesta sa kadalanan.
Nagpanawagan man ini sa mga pumuluyo nga ginabayaran lamang agud magpatigayon sang protesta nga indi magpadala sa kuarta bangud tuman ka delikado ilabi na sa karun nga panahon nga nagapangatubang sa pandemya.
Ginarespeto man nila ang kinamatarong sang mga tawo sa pagpractice sang tawhanon nga kinamatarong apang dapat makahibalo ang mga ini sa pagbutang sa lugar kag san-o ini ipractice.
Ginpahayag man sini nga nagakadapat lang nga panumdumon sang mga tawo kun may yara sang magbag-o sa tion nga magprotesta ang mga ini.
Ginpahanumdom man sini nga magpadayon sa pag-obserbar sang health protocols bangud mahimo nga tanan kita ang posible nga carrier sang coronavirus disease 2019.
Likawan man ang pagpalapta sang fake news kag magpabilin sa balay bangud sa risgo nga ginatuga sang virus.
