Lunsay nagapati ang apat ka mga presidential candidates nga dapat i-address sa madasig nga tinion ang teenage pregnancy sa Pilipinas kag naghatag sang mga proposals kun ano ang dapat nga himuon sa isa ka election forum nga gin-organisa sang Biyernes sang Catholic Bishops Conference of the Philippines (CBCP).
Nalakip sa mga efforts nga ila ginhighlight ang sex education, partnership sang komunidad kag simbahan, kasubong man ang pagtukod sang state system agud suportahan ang mga iloy nga pamatan-on.
Ginpabutyag sanday Labor leader Leody De Guzman, former defense secretary Norberto Gonzales, Senator Manny Pacquiao, kag Vice President Leni Robredo ang ila pagpamatok sa abortion.
Para kay Robredo, ang simbahan ang dapat magpartner sa gobyerno kaupod ang komunidad sa pagtapna sang teenage pregnancy.
Suno sa iya, tuman ka dako nga butang ang “pagtuo” sa pagtapna sang kaangay nga mga problema kag dapat nga conscious man ang effort agud makasulod sa partnerships nga may tinutuyo nga untaton nga ini nga problema.
Suno kay Robredo, ang iya opisina ang may yara sang existing program kaupod ang United Nations Population Fund tuhoy diri kag ginsuhestiyon nga dapat himuon sang gobyerno nga accessible ang ayuda para sa mga nagbulusong.
Suno diri, kun nagbusong ang isa ka bata, dapat may yara sang magasalo sa iya bangud kun wala, magasulod na ang pagkuha sang kabuhi.
Suno naman kay Pacquiao, dapat mangin God-centered ang sex education sa mga eskwelahan.
Suno sa iya, dapat itudlo sa mga kabataan nga may yara sang Diyos, nga malain magpakighilawas kun indi pa mag-asawa kag sudlon lamang ang ini nga butang kun kasado na.
Gindugang man sini nga ang responsibilidad sa pagtudlo sa mga kabataan sang sini nga topiko ang yara sa mga ginikanan.
Suno sa Senador, kun insakto ang pagpadako kag pag-edukar, indi ini paghimuon sang isa ka bata.
Nagapati naman si Gonzales nga isa sa solusyon agud mauntat ang teenage pregnancy amo ang hugot nga pagdumili sa abortion.
Suno sa iya, kun magbusong ang isa k bata, indi ini dapat pagpabay-an kag dapat magpadayon sa pag-eskwela.
Suno sa iya, dapat i-engganyo ang essential kag fundamental nga value sa pamilya nga Filipino kag ini ang pag-atipan kag pagbuligay.
Sa bahin naman ni De Guzman, ang kakulang sa palangabuhian, out-of-school youth kag access sa internet pornography ang dapat nga i-address.
Suno sa iya, ang edukasyon tuhoy sa sex kag pagbusong sa eskwelahan ang dapat lakipan sang topiko tuhoy sa teenage pregnancy kag dapat nga mangin responsable ang mga babaye kag lalaki sa ila mga kaugalingon.
Paagi diri, suno kay Ka Leody, madevelop sa bata ang pag-angkon sang handom, kag kun ini ang nadevelop, malikawan sini ang pagpakighilawas sang timpano.
Sang 2020, sa tunga sang una nga tuig sang pandemic, masobra 56,000 ka mga kabataan nga kababainhan nga naga-edad napulo ka tuig tubtob 17-anyos ang nagbusong, mas manubo kun ikumparar sang 2019.
Ang CBCP election forum ang ginpatigayon sa Ateneo kag ginstream online agud istoryahan ang mga issues may kaangtanan sa Catholic values kaangay sang hustisya kag sanctity sang kabuhi.
Gin-imbita man ang iban nga mga kandidato apang nagpamalibad ang mga ini bangud sa konflikto sa schedule.
