Apat ka mga regular employees sa San Carlos City Hall ang nagpositibo sa ginpatigayon nga random drug test.
Sa interview sang Bombo Radyo Bacolod kay San Carlos City Mayor Renato Gustilo, humalin sa Enero haloss kada bulan naman ang ila nga pagpatigayon sang random drug testing kag gikan sa masobra dos mil nga mga empleyado, regular man ukon job order, halos 1,500 na ang nakuhaan ang urine samples.
Samtang may 18 na sa kabug-usan nga nagpositibo kun sa diin kalabanan sa mga ini ang mga job order ukon casual employees.
Panindugan sang alkalde nga ang mga job order kag casual employees nga matukiban nga positibo sa illegal nga droga ang automatic na nga terminated sa trabaho.
Nahibaluan nga sang nakaligad, nagahimo pa ang City government sang tikang agud maremedyuhan ang mga matukiban nga positibo pinaagi sa pagpaidalum sa mga ini sa rehabilitation ukon spiritual renewal seminars kag ginarehire bilang empleyado sang ciudad.
Apang bangod madamo sa mga narehire nga anay nagpositibo, ang nagapabilin lamang gihapon nga drug users suno sa resulta sang kasunod nga mga random drug testing, gani nagdesisyon ang alkalde nga paluson na gid lamang ang mga ini sa trabaho.
Sa pihak nga bahin indi kaangay sa job order kag casual employees, ang regular employees nga magapositibo ang magakinahanglan pa nga mag-atubang sa madamo nga proseso sa idalum sang layi sa Civil Service Law.
Ang Civil Service Commission amo ang magahatag sang rekomendasyon sa Local Government kun ano ang sanctions nga idagdag sa nagpositibo nga empleyado.
Sa pihak sina, ang apat nga mga nagpositibo ang magapatigayon pa sang confirmatory test.
Nagakahangawa naman ang alkalde bangod nahibaluan sini nga sa pagdugay ang urine sample, amat amat man nga nagatahaw ang substance nga makita diri.
Nahibaluan nga kun ano nga urine sample ang gingamit sa una nga drug test, ini man ang pagagamiton sa confirmatory test.
Nagakahangawa si Gustilo nga sa paglawig sang inadlaw antes ang confirmatory test, nagtahaw naman ang epekto sang illegal nga droga sa lawas gani mahimo nga ang mga nagpositibo ang maga negatibo sa masunod nga resulta.
