Nagapaayo na sa hospital ang apat ka tuig nga bata matapos aksidente nga nabungguan sang isa ka scooter sa National Highway, Sitio Banag, Barangay Cayahagan, Sipalay City, takna alas-8:00 sang gab-i, Marso 31, 2026.
Sa interview sang Bombo Radyo Bacolod kay Police Lt. Cipriano Lumanog III, Deputy Chief of Police sang Sipalay City Police Station, duha ka menor de edad ang imbulbado sa aksidente nga ginalakipan sang 17 anyos kag apat ka tuig nga bata.
Suno kay Lumanog, nagabiyahe ang 17 anyos sakay sa Honda Click 125 scooter halin sa Sipalay City padulong sa Hinoba-an.
Pag-abot sa lugar, aksidente sini nga nabungguan ang apat ka tuig nga pedestrian nga hinali lang nagtabok sa karsada.
Bangud sa mga pilas sa lawas, ang bata ang gilayon nga gindala sang Sipalay Rescue Team sa Sipalay City Infirmary kag sang ulihi gin-refer sa ospital sa Bacolod City.
Ang drayber sang motor ang nakaangkon man sang mga pilas kag gindala sang isa ka concerned citizen sa Hinoba-an District Hospital.
Ang motorsiklo ang yara sa Sipalay City Police Station para sa nagakaigo nga disposisyon.
