Nakagwa na sa ospital kahapon ang apat ka tuig nga bata nga lalaki nga ginlamposan sang bato sa Hda Badiang Barangay E. Lopez, Silay City.
Madumduman nga nalubong na ang siyam ka tuig nga magulang sini nga babayi sang Dominggo samtang ang 15-anyos naman nga dalagita ang wala pa gid nakabugtaw matapos nga gin-operahan sa ulo kag padayon pa nga nagapa-ayo sa ospital.
Sa interview sang Bombo Radyo kay Ronelyn Montañez Ansiano iloy sang Borales siblings, dako ang iya pasalamat sa nagpangamuyo kag naghatag sang bulig matapos ang natabo sa iya mga kabataan, kag suno diri bisan nga tuman ang iya nga kasubo nagapakod lamang ini bangod may duha pa siya ka kabataan nga nagasalig sa iya.
Dugang pa sang iloy, nga matapos niya madul-ong papauli ang siyam ka tuig sini nga bata, magabalik man siya gilayon sa ospital agud bantayan pa ang 15-anyos nga dalagita.
Pahayag ni Ansiano, nga wala na ini sang plano nga magbalik pa sa pagtrabaho sa luwas sang pungsod, kag indi naman sini pagpulion ang duha niya ka kabataan sa balay kun diin natabo ang insidente.
