Patay ang apat ka tuig nga bata nga lalaki matapos nga ginlabo-labo sang kaugalingon sini nga amay sa Purok Lucay 2, Barangay Camingawan, Kabankalan City alas-12:53 kahapon sang udto.
Sa interview sang Bombo Radyo Bacolod kay Police Lt Col. John Joel Batusbatusan, hepe sa Kabankalan City Police Station, nagapanyaga ang amay nga ginkilala nga si Chalier Laurente, 48 anyos, laborer, upod ang tatlo sini ka kabataan nga mga naga-edad 23 anyos, 12 anyos kag ang agot nga apat ka tuig nga bata.
Matapos ang panyaga, hinali na lamang ginmanduan sang amay ang subang nga maggwa sa balay kag ini ang iya nga ginlock kag nagkuha sang binangon.
Wala sang rasun nga hinali nalang sini nga ginbuno kag ginlabo-labo sa nagkalainlain nga bahin sang lawas ang agot samtang naglumpat naman sa bintana ang 12 anyos sini nga utod.
Ginapahayag nga antes ginbuhat ang krimen, ang amay ang nagbuya pa sang tinaga nga “balunon ta kamo”.
Ang bata ang gindala pa sa ospital apang gindekalarar nga dead on arrival.
Suno kay Batusbatusan, duha ka tuig na ang nakaligad sang ginlampusan man sang suspetsado sang martilyo sa ulo ang iya nga asawa nga gintunaan sang kamatayon sini.
Sa paglantaw sang hepe, ang amay ang wala sa normal nga paminsaron apang aminado ini nga psychiatrist lamang ang makaseguro sang kahimtangan sang amay.
Pahayag ni Batusbatusan nga yara na sa kustodiya sang Kabankalan City Police Station ang suspetsado kag ini ang natalana nga pasakaan sang kaso nga parricide.
Aminado man ini nga masubo ang paskwa sang duha ka nabilin nga kabataan bangod sila ang nadulaan sang manghod manghod, nakahunong ang amay, kag sila ang wala naman sang iloy.
