Ginbawian sang kabuhi ang apat katuig nga bata matapos nga nabungguan sang salakyan sa Purok Taytay, Barangay Oringao, Kabankalan City, Negros Occidental, Miyerkules sang aga, Oktubre 7.
Ginkilala ang napatay kay Neil John Timtim, apat ka tuig, residente sang Purok Payong, Brgy. Oringao, Kabankalan City, Negros Occidental.
Samtang naangkon sang madamo nga pilas ang kaupod sini nga Lito Timtim, 26 anyos, lalaki , poultry helper kag residente sang nasambit nga lugar.
Sa imbestigasyon, gintuad sang saksi nga si Gilbert Enonson, legal ang edad kag residente man sang amo nga lugar nga ang duha ka persona ang nagalimpyo sang ila nga tricycle sa kilid dalan apang hinali nalang nabungguan sang salakyan nga naga-usoy nagikan Dumaguete City padulong Bacolod City.
Gindala ang duha sa ospital apang gindeklarar nga dead on arrival ang menor de edad.
Ang nasambit nga salakyan amo ang KIA Sonet nga ginamaneho ni Marvin Rod Tamondong, 39 anyos, lalaki, kasado, construction manager, kag residente sang Karangalan Village, Dela Paz, Pasig City.
Gin-ako ni Tamondong nga napiyungan ini rason nga nadulaan sang control ang salakyan kag nagderecho sa kilid dalan nga ginahamtangan sang duha ka biktima.
Ang driver sang salakyan ang yara sa karun sa kustodiya sang Kabankalan City Police Station.
