Nagpositibo sa rapid test ang apat sa 28 ka mga overseas Filipino workers (OFWs) nga nagbalik sa ciudad sang Bacolod sang damlag lang.
Suno kay Bacolod City Mayor Evelio “Bing” Leonardia, sa rapid test pa man lang nagpositibo ang mga ini kag kinahanglan pa nga ipaidalom sa Polymerase Chain Reaction (PCR) test agud makumpirmar nga positibo ini sa COVID-19.
Suno sa alkalde, ginpahibalo siya ni Dr. Grace Tan, pinuno sang City Health Office nga assymptomatic ang apat ka mga OFWs.
Ginpasiguro naman ni Leonardia nga ipaidalom ang mga ini sa swab test subong nga adlaw.
Nahibaluan nga nagatinir karon ang mga OFWs sa Graciano Lopez Jaena Elementary School apang nagpasalig na ang Overseas Workers Welfare Administration (OWWA) nga sabton nila ang hotel accommodation sang mga ini matapos nakig-angot sa ila ang ciudad.
Gin-athag naman ni Leonardia nga isa sa mga rason kun ngaa wala sila gintanyagan sang OWWA nga sarang ma-shoulder sang ahensya ang hotel accommodation bangud naka-preparar na ang ciudad sang quarantine center para sa mga OFWs.
Ini kaangay sa iban nga LGUs nga wala ang mga ini naka-preparar, gani ginbutang sila sa hotel.
