Nagdangat na sa karon sa pito ka mga probinsya sa Democratic Republic of Congo ang Ebola outbreak, ang pinakadasig nga paglapta sang balatian sa maragtas sang pungsod, samtang wala gid sang anuman nga senyales nga matapna na ini.
Ginkumpirmar sang Gobernador sang northwestern province sang Sud-Ubangi nga si Jean-Rene Galekwa Vundawe nga may nakita sila nga traces sang Bundibugyo Virus sa gin-testing nga sample, isa ka tumalagsahon nga sahi sang Ebola nga nangin rason sang outbreak.
Suno sa isa ka opisyal kag anay health minister nga si Jean-Jacques Mbungani, may nagpositibo nga kaso sa Gwaka, sa Sud-Ubangi province.
Ang pasyente isa ka 23-anyos nga lalaki kag ini ang ginbawian sang kabuhi.
Suno diri, sa sulod lamang sang tatlo ka semana, nagbiya ang lalaki sa South Kivu province, nga may kumpirmado nga mga kaso sang Ebola, nagpadulong ini sa Rwanda kag Uganda kag nagbyahe sa Ituri Province nga sentro sang outbreak.
Ulihi sini nga ginkadtuan ang Tshopo, Mongala kag Sud-Ubangi.
