Nag-apela si Bacolod City Mayor Evelio “Bing” Leonardia nga presidente sa League of the Cities of the Philippines (LCP) kay vaccine czar Sec. Carlito Galvez nga ilakip sa prayoridad sa paghatag sang alokasyon sang COVID-19 vaccine ang mga highrisk nga mga local government units sa bilog nga Pilipinas.
Suno kay Bacolod City Administrator Em Ang, ang apelasyon ang ginpakigbahin ni Leonardia sa meeting sang mga alkalde kag gobernador sa Pilipinas kaupod sanday Vaccine Czar Sec. Galvez, Department of Interior and Local Government (DILG) Sec. Eduardo Año kag Department of Health Sec. Francisco Duque III.
Suno diri, palarehas ang mga concern sang madamo nga mga LGU natuhoy sa gamay nga alokasyon sang COVID-19 vaccine apisar nga madamo naman sang nag-abot nga bakuna gikan sa donasyon sang COVAX facility gikan sa World Health Organization (WHO).
Suno kay Ang, ini ang tuga sang rekomendasyon sang OCTA Research Group nga 90 porsyento sang vaccination rollout ang italana sa NCR Plus Areas.
Paathag sang City Administrator nga madamo sang mga high risk nga LGU ang wala makabahin sa NCR Plus Areas, gani gamay gihapon ang nagakabatun sang mga ini nga COVID-19 vaccines.
Bangod sa mga reklamo, ginapakamaayo nalang ni Leonardia nga opisyal ini nga I-request kag Sec. Galvez.
Nahibaluan nga kalakip man ang ciudad sang Bacolod sa mga nagataas ang kaso sang COVID kun sa diin masami na nga nagadangat sa 3-digits ang nagakadugang sa kaso sa isa ka adlaw.
Suno kay Ang, bangod sa pagsaka sang kaso, ginclassify naman nga Moderate Risk ang Bacolod City, gani ginakahangaw-an sini ang posibilidad nga magsaka ang classification.
Indi man luyag sang City Administrator nga magpatuman sang mga granular lockdowns sa ciudad samtang pinakaulihi naman sa ila nga mangin desisyon ang pagpasaka sang quarantine status.
Pahanumdom ni Ang nga sa tion nga mangin Modified Enhanced Community Quarantine (MECQ) ang Bacolod, magatuga naman ini sang kabudlayan sa tanan.
