Ginatugyan na lamang sang kongresista sang lone district of Bacolod sa mga eksperto ang pagdesisyon angot sa ginaapelar sang mga doctor nga ibalik ang syudad sa Enhanced Community Quarantine (ECQ).
Sa interview sang Bombo Radyo Bacolod kay Bacolod City Lone District Congressman Greg Gasataya, ginpahayag sini nga nabaton na niya ang kopya sang sulat sang mga doctor nga nagaapelar sa National Inter-Agency Task Force sang duha ka semana nga pagpaidalom sang syudad sa ECQ.
Madumduman nga ginpahayag ni Vice Mayor El Cid Familiaran nga nakasaad sa sulat sang grupo sang mga doktor ang ila nga concern ilabi na sa nagasaka nga kaso sang coronavirus kun sa diin ang Bacolod ang nagapanguna sa Western Visayas sa may pinakamadamo nga indigenous cases.
Ila man ginhatagan-pagtamod ang mga ospital nga nagdeklarar nga yara na sila sa full capacity kag ila man gin-ako nga ginakapoy na sila.
Suno kay Gasataya, gintawgan na sini ang national agud itugyan ang pagdetermine sang tikang angot sa apelar sang mga bangud indi sini luyag nga magpatigayon nga daw kaangay sang medical expert kag ang ginapangatubang sa karun ang indi ordinaryo nga sitwasyon.
Nagpanawagan man ini sa mga pumuluyo nga magsunod sa health protocols bangud may mga reported na nga local cases.
