Sa pihak sang mga alegasyon batok kay Vice President Sara Duterte, ginpahayag sang iya spokesperson nga si Atty. Paolo Panelo nga indi ini magresign sa iya posisyon.
Suno diri, indi boluntaryo nga manaug ang bise presidente sa iya nga post bangud ginsaligan siya sang mga botante nga nag-elect sa iya.
Ginkumpirmar man sini nga nagapabilin ang plano ni Duterte nga magpapili sa 2028 national elections bilang presidente.
Suno kay Panelo, kabahin lamang sa pagpang-harass kay Vice President Sara Duterte ang pagpagwa sang mga alegasyon ni Rodulfo Gracioso Jr. nga nagpahayag nag-deliver sang minaleta nga kwarta kay VP Sara.
Gintawag naman ni Panelo nga bogus ang mga akusasyon kag ginpahayag nga damo sila sang pamatuod nga nagabinutig man si Ramil Madriaga.
Si Gracioso ang isa ka former police nga nagbuyagyag sang gin-alegar nagdul-ong sang mga maleta nga puno sang cash kay Vice President Duterte, former President Rodrigo Duterte, kag kay Congressman Paolo “Pulong” Duterte.
Samtang, si Madriaga naman ang nagpakilala bilang bagman ni Vice President Duterte.
Nagahulat na lamang ang kampo ni Duterte para sa sworn affidavit ni Gracioso agud i-examine ang tanan nga detalye kalakip ang mga specific nga petsa kag lokasyon.
