Ginkompirmar sang pinuno sang Land Transportation Office (LTO)-Himamaylan City District Office nga humalin subong nga Hulyo 1, suspendido ang application para sa student driver’s permit.
Sa interview sang Bombo Radyo Bacolod kay Renato Novero, ginpahayag sini nga maresume ang pagbaton sang student permit application sa Agosto 3 apang antes makaapply ang applicant, kinahanglanon nga magkuha ini sang 15 ka oras nga theoretical course sa driving school.
Sa tion nga iupload ang data, makita sang LTO agud maproseso ang dokumento sa pag-isyu sang permit sa applicant.
Suno kay Novero, may mga module nga tun-an ang mga aplikante kag ginabanta nga mabakal sa presyo nga P200 per module gani P600 ang tatlo bangud ini ang required nga kuhaon sang mga applicants.
Bisan diin nga bahin sang Pilipinas, ini ang igapatuman nga patakaran.
Suno diri, sa tion nga wala sang driving school sa lugar sang mga applicant, mahimo sila magkadto sa regional office.
Ginpahayag man sang pinuno nga ang pagpatuman sang bag-o nga patakaran ang makapasiguro nga may nagakaigo nga ihibalo ang mga drivers sa pagpadalagan sang salakyan sa dalanon.
Nagpanugyan man ini nga sa pagresume sang application sang student permit makig-angot anay sa malapit nga opisina sang LTO agud maabisuhan sang nagakaigo nga himuon antes mag-apply.
