BACOLOD CITY — Ginpanindugan sang isa ka miembro sang House committee on suffrage and electoral reforms nga gina-obra lang nila ang ila mga obligasyon kasunod sang pagkapasar sa committee level sang hagna nga nagatuyo nga liwat naman ipaiway ang Barangay kag Sangguniang Kabataan elections.
Sa interview kay Abang Lingkod Party-list Representative Stephen Paduano, ginpahayag sini nga ginatuman lang nila ang ila mga obligasyon nga aktuhan ang mga pending bills sa nasambit nga komite kun sa diin nalakip ang hagna nga hiwaton sa ikaduha nga Lunes sang Oktubre 2018 hiwaton ang barangay elections sa baylo nga Mayo 14, 2018.
Wala nagakabalaka si Cong. Paduano kun wala sang mangin counterpart sa Senado ang nasambit nga hagna, ang importante suno diri nga ginatuman nila ang ila obligasyon ilabi pa nga ang kwarta sang pumuluyo ang ginasweldo sa ila.
Suno pa diri, masarangan pa sang komitiba nga pabakuron sa plenaryo ang hagna antes ang Lenten break sa Marso 21, apang magadepende sa gihapon sa Senado ang kapalaran sang hagna nga mapaiway sa ikatatlo nga kahigayunan sang Barangay kag SK elections.
