Ginpahayag sang isa sa mga residente sang Hacienda San Antonio 2 sa Barangay Dos Hermanas, Talisay City, Negros Occidental nga nakulbaan sila sa mga blue guard sang ginapahayag tag-iya sang duta nga si Paul Chang.
Sa interview sang Bombo Radyo Bacolod kay Lorna Morillo, isa sa mga residente kag Comprehensive Agrarian Reform Program (CARP) Beneficiaries, kada aga nagasulod sila sa nasambit nga lote agud nga mag-atipan sang ila nga mga tanum nga monggo bangud ini ang ila nga palangabuhian apang ginpagwa sila sang blue guard.
Suno kay Morillo, indi man manami ang approach sang mga nagabantay sa duta bangud daw indi tawo kun sila ang tabugon agud maggwa.
Panindugan sang mga ini nga sila ang beneficiaries sang duta gani ila gid ini ubrahon.
Suno diri, si Chang ang nagbakal sang duta kay Josefina Lacson apang ginapahayag nga nagboluntaryo agud nga ipaidalom sa CARP.
Samtang ang duta ang gin-arenduhan man liwat ni Chang gikan sa mga beneficiaries.
Apang sa ulihi ginkakibot sang mga ini nga may naggwa nga sales of right nga nagapakita nga ang duta ang ginbaligya na sang mga beneficiaries kay Chang.
Panindugan ni Morillo nga ang ila nga napirmahan nga dokumento ang arendo lamang.
Suno diri, antes paman ang nakuhaan sang video nga pagpalupok sang armas, masami na ini nga ginahimo sang mga blue guards.
Dugang pa sini nga ang ila nga tanom sa kampo sang tinalikdan ang ginpalapakan man sa tractora.
Suno diri indi na maayo ang ila nga eksperyensya kag sila ang daw kaangay ginaabusaran na.
Nagpanawagan man ini sa mga kapulisan nga kuntani sila ang mabuligan man bangud indi na maayo ang ginahimo sa ila sang blue guard sang tag-iya sang duta.
