Ginpanindugan ni Henjie Cuadra nga wala siya sang kwarta nga gintaban nagikan sa mga nag-invest sa RGS World Marketing Corporation kundi ginapangita man niya ang founder sang korporasyon.
Sa interview sang Bombo Radyo kay Cuadra sang Barangay 2, Hinigaran, ginapangita man niya si Rodolfo Garcia Salarda nga amo ang nagtukod sang RGS World Marketing Corporation bangud nag-invest man ini sang dako nga kantidad sang kwarta kag wala nabalik.
Si Cuadra ang gindesignate sadto ni Salarda bilang liaison officer ukon in-charge sa mga supplies sang opisina.
Suno diri, wala na kuntani ini nagasaka sa poste agud nga magtakod sang CCTV camera kun minilyon ang iya nga nataban halin sa mga nagpay-in.
Bulan sang Abril tuig 2021 sang ulihi niya nga nakaupod si Salarda sa isa ka prayer rally sa Hinigaran bangud didto man nila ginhulat ang ila nga pay-out kag sweldo apang wala ini nahatag.
Makaligad ang duha ka adlaw, nagkadto si Cuadra sa balay ni Salarda sa Manville Royale sa Barangay Tangub apang ginbalabagan ini sang gwardiya nga makasulod.
Makaligad ang pila pa gid ka inadlaw, ila nabalitaan nga nagpalagyo si Salarda kag indi naman macontact ang iya nga cellphone number.
Suno kay Cuadra, nagfile sila sang reklamo sa National Bureau of Investigation, kaupod ang mga team leaders kag coaches, agud nga mapangita si Salarda.
Suno kay Cuadra, P1.9 million ang kabug-usan nga kwarta nga iya nainvest kag ginalauman nga mangin P3.8 million kun matigayon ang pay-out.
Sa bilog nga pamilya ni Cuadra, ginabanta nga P4 million ang kabug-usan nga kantidad nga ila nainvest sa RGS nga naalimunaw na.
