Nagapati ang hepe sa Bacolod Police Station 4 nga katapo sang Aki Cuadra Robbery Group si Arian Mark Salaver alyas Jokjok nga ginluthang sa Purok Cabacawan, Barangay Villamonte, Bacolod City subong nga gab-i
Suno kay P/Maj Ritchie Gohee, station commander sa Bacolod Police Station 4, subong lang nga adlaw nakapauli sa lugar ang biktima, kag wala nahibaluan kun sa diin ini nagapanago.
Ini bangod may nakafile nga kaso batok diri sa bahin sang Bacolod Police Station 7 natuhoy sa robbery-hold up.
Sa karun, wala pa may napanaog nga warrant of arrest sa biktima maykaangtanan sa kaso.
Paathag ni Gohee nga nagapangtaya sang armas-luthang sa mga nagamotorsiklo si Salaver.
Suno diri, ang ulihi nga report nga sang wala ginhatag sang tag-iya ang iya motorsiklo, gintiro pa nila ini sang iya kaupod.
Ang kaupod ni Salaver ang nadakop apang siya ang nakapalagyo, tubtob sa siya ang napatay subong nga gab-i.
Bisan sa Bacolod Police Station 4, may reklamo man diri tuhoy sa pagpamuno, apang wala gindayun ang kaso bangod nahadlok ang nangin biktima.
Samtang, nagapati naman si Gohee nga katapo sang Aki Cuadra Robbery Group ang biktima.
Ini bangod sang napatay ang lider nga si Arnold “Aki” Cuadra, nakita sang mga Barangay Tanod sa balay sini sa Barangay Vista Alegre nga nagsulod si salaver sa balay ni Cuadra.
Dala naman sini sa paggwa ang kapin tunga sa sako, kag wala natumod kun ano ang gindala sini.
Bangod sini, hugot nga nagapati si Gohee nga katapo ini sa grupo bangod wala man ini sang rasun nga magsulod sa balay ni Cuadra kun wala ang mga ini sang koneksyon.
Sa pihak nga bahin, padayun man ang ila imbestigasyon sa pagpaarak sang luthang sa biktima.
Wala pa matumod kun pila ang igo sang biktima apang nakita sa crime scene ang 10 ka empty cartridge sang cal 45 pistol, isa ka empty cartridge sang wala matumod nga kalibre sang armas luthang kag tatlo ka slugs sang bala.
