Nangin madinalag-on ang ginpatigayon nga dry-run sang 1st Negros Occidental Provincial Mobile Force Company sa ila inisyatibo batok sa loosed firearms nga ginatawag “armas baylo bugas” nga ginhiwat sa Hda. Urbasa, Barangay Mabini, Escalante City nagligad nga Setyembre 13.
Sa interview sang Bombo Radyo kay P/Lt. Col. Nazer Canja, officer-incharge sang 1st NOCPMFC, ginpahayag sini nga bangud sa madamo nga insidente nga nagakatabo kun sa diin involved ang mga loose firearms, ila ginpakamaayo nga maghimo sang programa nga “armas baylo bugas” agud ma-engganyo ang mga pumuluyo nga nagahupot sang armas luthang nga isungka ini sa kapulisan.
Suno kay Canja, magluwas nga makabulig sila sa mga residente subong nga may pandemic paagi sa paghatag sang isa ka sako nga bugas sa naga-sungka, makabulig man ang ini nga programa agud mapabilin ang kalinong kag katawhayan sa Negros Occidental.
Samtang, tunga sa sako nga bugas naman ang ginahatag sa nagpatigayon.
Magluwas sa Escalante City, nangin pilot areas man sang “armas baylo bugas” ang Salvador Benedicto kag Silay City.
