Nagpasalig ang Armed Forces of the Philippines (AFP) nga padayunon sini ang pag-implementar sang mga mission sa mga areas nga covered sang exclusive economic zone sang Pilipinas apisar sang nagapadayon nga harassment sang China sa West Philippine Sea.
Suno kay AFP deputy chief of staff Lt. Gen. Sean Gaerlan, magapadayon ang ila missions gani kinahanglan nila sang suporta nagikan sa mga Filipino.
Suno diri, padayon nila nga igadeploy ang ila pwersa lakip na ang Navy kag Air Force sa area agud ipakita nga ini ang ginapanag-iyahan sang Pilipinas.
Kahapon, ginbungguan kag ginpalibutan sang water cannon sang mga Chinese Coast Guard (CCG) vessels ang BRP Datu Sanday sang Bureau of Fisheries and Aquatic Resources (BFAR).
Humalin alas 10:30 ang takna sang aga, gin-alegar nga ginlambatan sang mga Chinese ang Philippine vessel nga yara sa 10 nautical miles malapit sa Sabina shoal.
Tubtob alas 2:00 ang takna sang hapon, gintuparan kag ginbungguan sang Chinese Coast Guard (CCG) vessels sang masobra lima ka beses ang BRP Datu Sanday.
Ginpalibutan sang CCG 3104, 4102, 21555, 21551, kag pila ka mga militia vessels ang BRP Datu Sanday kag dululungan nga gin-atake sang water cannon nga ginatarget ang navigational equipment sang nasambit nga sakayan sang BFAR.
Madumduman nga ang CCG 21551 ang nagbunggo sa BRP Bagacay nga nangin kabangdanan sang dako nga buslot sa barko sang Lunes sang kaagahon.
Ini man ang una nga nagbunggo sa BRP Datu Sanday kahapon.
