Nagpatigayon sang joint maritime drills ang Armed kag Defense forces sang Pilipinas, Amerika, Australia, Japan kag New Zealand sa exclusive economic zone sang Pilipinas kahapon, Setyembre 28.
Ginkumpirmar ini ni AFP chief Gen. Romeo Brawner Jr. sa isa ka statement
Suno diri, nagapakita ang ginhugpong nga pwersa sang nasambit nga pungsod sang kolektibo nga commitment agud nga pasanyugon pa ang regional kag international cooperation bilang suporta sa hilway kag bukas nga Indo-Pacific.
Ginpahayag sang AFP chief nga nag-operate sang magkaupod ang naval kag air force units sang mga
nagpasakop nga pungsod para sa pagpasanyog pa sang kooperasyon kag interoperability sa tunga sang ila tagsa-tagsa nga Armed Forces.
Ginpatigayon man ang aktibidad nga nasanto sa international law kag ginakonsiderar ang kahilwayan sa paglayag kag kinamatarong kag interes sa iban nga estado.
Suno pa sa AFP, ang nasambit joint sail ang nagapakita sang commitments sang mga pungsod sa pagpatuman sang kahilwayan sa paglayag kag pagpalupad sang aircraft, legitimate nga paggamit sang dagat kag international space kasubong man pagrespeto sa maritime rights sa idalom sang UN Convention on the Law of the Sea.
Wala naman ginhinambit sang AFP chief ang mga nagpasakop nga mga assets sang pungsod apang suno sa Australian Defense Ministry, kaupod sa exercises ang ila nga His Majesty’s Australian Ship (HMAS) Sydney kag Royal Australian Air Force P-8A Poseidon maritime patrol aircraft.
Ang nasambit nga exercise amo ang ikaapat nga Multilateral Maritime Cooperative Activity subong nga tuig.
Ang una nga exercise ang ginpatigayon sadtong Abril sa EEZ man sang Pilipinas kaupod ang US, Japan kag Australia.
Ginsundan ini sadtong Hunyo kag Agosto.
