Nagdangat sa kapin P35 Million ang arrears sang dalagko nga merkado sa syudad sang Bacolod kalakip na ang Manokan Country suno sa chairman sang Committee on Markets and Slaughterhouse sa Sanggunian Panlungsod sa syudad sang Bacolod.
Sa interview sang Bombo Radyo Bacolod kay Councilor Celia Flor, plano sini nga magpasar sang ordinansa sa condonation para sa mga penalties kag surcharges agud nga maggamay ang balayaran nga principal sang mga nagarenta sa tatlo ka dalagko nga merkado sa syudad kasubong man sa manokan country.
Suno kay Flor, matapos ang condonation sang penalties and surcharges mahimo ang mga ini makahimo sang arrangement agud nga sa masunod nga duha ka tuig maimpas na sang mga ini ang ila nga mga kautangan sa syudad sang Bacolod.
Suno kay Flor, madamo naman sang condonation ordinance nga gin-issue ang syudad apang wala pa man ini ginasunod sang mga nagarenta sa stalls sang mga merkado sa syudad kasubong man sa Manokan Country.
Ginpahayag man sang konsehal nga nagpasugot man ang mga tenants sa manokan country nga ipasira ang stalls sa tion nga indi sila makabayad sa pagahimuon sini nga payment scheme.
Suno kay Flor ang Burgos kag Libertad Market ang may yara sang P11 million nga arrears kada isa samtang ang central market ang may yara lamang nga naganubo sa P11 million samtang ang manokan country ang may yara sang P8.5 million arrears.
Sa karun, unahon anay sang konsehal ang side walk vending ordinance.
