Liwat nga nakarekord si Asa Miller, ang nagaisahanon nga atleta sang Pilipinas sa 2022 Winter Olympics sang DNF ukon did not finish sa men’s alpine skiing sang Miyerkules.
Ang two-time Olympian ang nag-ski sa sulod sang 36 ka segundo antes nagcrash out sang masobra duha ka beses samtang ini ang yara sa ice sa giant slalom sa sulod sang 15.90 seconds.
Suno kay American coach Will Gregorak, nabudlayan si Miller sa snow, nga indi maayo tupong.
Suno sa iya, sa ini nga sahi sang snow, wala nagarespond sang maayo ang mga skis para kay Miller gani mabudlay para sa iya ang makakuha sang feeling sa skis.
Gin-ako naman ni Miller ang responsibilidad nga wala ini nakahatag sang maayo nga performance sa Beijing.
Ginbuksan sang skier ang iya campaign pinaagi sa DNF sang ini ang nadanlog sa giant slalom sang weekend.
Wala nalapawan ni Miller ang iya rekord sa 2018 Olympics sa Pyeongchang kun sa diin nagtapos ini nga ika-70 sa 110 ka mga participants sa giant slalom.
