Nagdangop sa Bombo Radyo Bacolod ang asawa nga gin-alegar ginharass sang iya bana kag siya wala ginhatagan sang barangay protection order sang Violence Against Women (VAW) Desk sang Brgy Busay, Bago City.
Sa interview sang Bombo Radyo kay Analiza Mission Matinong, kasado ini sa iya bana kag may yara sila sang bata apang nagbulagay ang duha matapos nga natukiban nga may relasyon ang iya bana sa iya bayaw.
Suno diri, ginhambalan sini ang iya bana nga magpalayo na sa ila sang iya bata ukon sila ang ipapreso sini.
Naghambal naman ang bana nga patindugan sila anay sang balay sang ila bata kag matapos nga napatindog ang balay, nagapadala man ang bana sang suporta para sa ila anak.
Apang, kasunod sini gin-alegar sang asawa nga makapila ka beses nga nagapadulong ang bana sa ila balay nga amat-amat nga nagakuha sang mga gamit.
Ginkuha sang bana ang tatlo ka motorsiklo kag iban pa.
Nagatrabaho ang bana sini bilang manubaligya sang isda, kag sa 12 ka banyera nga may yara sila, nakuha na sini ang siyam apang liwat ini nga nagbalik para kuhaon ang tatlo pa gid.
Bangud sini, nagkuha sang dos por dos nga kahoy si Matinong kag ginlampusan ang banyera nga nauyatan sang iya bana apang naigo ang iya kamot.
Sa padayon nga paglampos sini sa banyera, nautod ang kahoy kag ini ang ginpudyot sang bana kag ginhampak sa butkon ni Matinong.
Bangod luyag ni Matinong nga indi na magpalapit pa ang iya bana sa ila, nagpadulong ini sa Violence Against Women (VAW) Desk sang Brgy Busay, apang siya ang ginhambalan ni Gelani Legaspi nga husto lang nga kuhaon sang bana ang iya mga gamit bangod siya man ang nagapanag-iya kag dapat ihatag pa sini ang yabi sang balay sa bana agud makakuha ini sang iban pa nga gamit.
Nagpadulong man sa Bago City Police Station si Matinong para magpablotter kag nagpasaka man ini sang criminal case sa prosecutors office.
