Estable na ang kondisyon sang asawa nga ginluthang kahapon sang duha ka kawatan sa Concepcion Public Market sa Talisay City kun sa diin dead on the spot ang bana sini nga nag-agom sang igo sang bala sa dughan.
Kahapon, ala-1:30 sang kaagahon nagluntad ang insidente sang pagpangluthang sa Concepcion Public Market, Zone 4, Barangay Concepcion, Talisay City, kun sa diin naaktohan sang mag-asawa nga sanday Ildefonso Medalla kag Denalyn Medalla, residente sang nasambit nga barangay, ang duha ka lalaki nga nagapangawat sa katupad nila nga bloke.
Nahimo pa nga nag-agaway si Ildefonso kag ang suspek sang bag, apang ila gintiro ang bana nga gintunaan sang kamatayon sini samtang si Denalyn naman gintiro sang isa ka bes sa tyan apang ini nakapalagyo kag nakapangayo sang tabang sa mga residente.
Sa interview sang Bombo Radyo kay Police Major Karena Onio, deputy chief of police for operations sang Talisay City Police Station, dako ang posibilidad nga indi mga residente sang ciudad ang duha ka suspek kasubong man nga may psoibilidad nga indi lamang duha ang suspetsado apang sila may kaupdanan pa nga iban.
Suno diri, wala pa sang makabig nga persons of interest sa natabo nga pagpangluthang.
Nagconduct naman ini sang koordinasyon sa iban nga estasyon sang kapulisan sa kaangay nga mga insidente nga nagluntad.
Kasubong man nga nakig-angot ang mga ini sa mga establishemento sa merkado nga may CCTV kun sila makakuha sang kopya sang footage.
Samtang, narekober sa area, ang walo ka pakete sang sigarilyo kag isa ka putos sang sinsilyo nga nawigit sang mga kawatan, kasubong man nga narekober sa area ang apat ka basiyo kag isa ka liso sang wala nahibaluan nga calibre sang armas luthang.
