Nangin topiko sa social media ang asawa sang aktor nga si Baron Geisler nga si Jamie Evangelista matapos ini magbilin sang komento sa isa ka Instagram post sang aktor nga daw gina-engganyo ini nga magpaidalom liwat sa drug rehabilitation.
Apisar na-delete na ang nasambit nga komento, naglapta ang mga screenshot sini sa social media.
Apang, wala pa sang kumpirmasyon ukon pahayag nga nagapamatuod sa anuman nga kahimtangan sang aktor.
Magluwas diri, nag-share man si Evangelista sa iya Instagram Story sang pila ka mga quotes natuhoy sa pagbag-o kag accountability.
Isa na diri ang may pahayag nga “No one plays the victim better than the one who caused the damage,” sa diin gin-tag pa sini ang Instagram account ni Geisler kag ginbutangan sang caption nga, “Best actor.”
Sa karon, wala pa sang opisyal nga pahayag si Baron Geisler angot sa mga nangin social media posts sang iya asawa.
Madumduman nga sang Hulyo 2025, nangin bukas si Geisler sa pagpakigbahin sang iya mga inagyan sa paggamit sang illegal nga droga kag pag-abuso sa makahulubog nga ilimnon.
Gin-ako man niya nga nagpangayo ini sang bulig sa iya pamilya agud makasulod sa rehabilitation facility, nga nangin umpisa sang iya pag-ayo.// Ginpahayag man sang aktor nga siya amo isa ka “recovering alcoholic.”
Ginkasal sanday Baron Geisler kag Jamie Evangelista sang 2019 kag may isa sila ka bata nga babayi.
