Malipayon apang masubo man ang asawa ni Maestro Lucio ukon si Nunelucio M. Alvarado nga ginhingadlan bilang National Artist for Visual Arts apisar nga ini ang may-ara na sang dementia.
Nahibaluan nga duha ka Negrense ang ginhingadlan nga National Artist sa idalom sang Proclamation No. 1414, series of 2026, nga ginalakipan ni Maestro Lucio sang Sagay City kag Teddy Hilado sang Silay City, nga nagbatun sang posthumous award bilang National Artist for Theater.
Sa interview sang Bombo Radyo Bacolod kay Rosalia Alvarado, indi siya ang nagbid bangod indi niya luyag nga siya mismo ang magrequest para sa pagkilala.
Ini ang ginsuhestyon sang ila tourism officer, samtang ang judge sa film festival nga si Tito Valiente amo ang nagpresentar nga maghimo sang deed book.
Wala man ini naglaom nga madala ang iya bana bangod 27 ang mga nagbid nga mangin national artist for visual arts, samtang sa 27 duha lamang sila ni Imelda Cajipe-Indaya sang Manila ang napilian.
Ginapasalamat sini sa Ginoo nga nagbunga gid man ang mga sakripisyo sang iya bana.
Apisar sa kalipay, nasubuan man ini bangod indi nagid ma-apresyar sang iya bana ang pasidungog tuga sang ginasuprer nga dementia.
Sa pihak sini, nagapati si Rosalia nga indi gid man luyag sang iya bana nga mangin sikat, bangod nabasahan sini sa isa sa mga write-up sang iya bana sa newspaper nga “I don’t want to be popular, I want my message to get across.”
Sa kaangot nga balita, ginpahayag ni Rosalia nga sila ang nagkilalahay sang 21 anyos si Maestro Lucio samtang siya ang 16 anyos.
Sa umpisa wala sini na-apresyar ang passion sang iya bana nga ginatawag sini sa hayo nga “Nune.”
Bilang artist, masami man siya nga ginabilin sang iya bana kun ini ang maglakat sa lainlain nga lugar, nga kun kis-a nagapauli makaligad sang tatlo ka bulan.
Suno diri, may tion pa nga indi matapos sang iya bana ang obra nga t-shirt printing bangod gina-akumodar gid sini ang mga luyag magpapinta sa iya.
Gani, siya na lamang ang nagapadayun sang tshirt printing samtang ang bata naman nila ang nagabulad agud magmala ang printing.
Sila ang may anom ka kabataan, kag kapin 30 na nga apo.
Suno kay Rosalia, naglab-ot na ini sa tion nga halos bulagan na ang iya bana, bangod sa kabudlay sang ila pagpangabuhi, apang pahayag ni Maestro Lucio nga siya lamang ang luyag sini makaupod sa kabuhi, kag ang ginahimo ang para man sa ila nga pamilya.
Pahayag sini nga na-apresyar na lamang niya ang passion sang iya bana sang siya ang gina-invite na sa mga mabatun sini nga award, nga iya man nga na-enjoy.
Suno diri, sadto nakulbaan ang tawo sa iya artwork bangod para sa iban ini ang makahaladlukan.
Ini bangod wala sang labot si Maestro Lucio kun maluyagan sang iban ang iya obra, sa baylo ang painting ang iya pamaagi para mapabutyag ang balatyagon.
Dugang pa sini nga sadto na impluwensyahan sang aktibista ang iya bana, nga naga-impluwensya man sa iya art, kag rasun nga wala ini nagpadayun sa kurso nga visual arts.
Nagbag-o lamang sa ulihi ang iya art style matapos mag-immersion.
Kalakip sa nakilala sini nga artwork ang nahanungod sa sitwasyon sang mga nagatrabaho sa kampo.
Ang obra ang ginpinta ni Maestro Lucio sang ini ang nagbatun sang allowance nga madasig lamang niya nakuha, apang ang mga trabahante nga iya nalabayan ang nalab-utan na sang hapon sa paghulat sang ila sweldo.
