Patay ang asawa matapos ginbuno sang iya bana sa Proper, Barangay Refugio, Calatrava, Negros Occidental kagab-i, Agosto 11.
Ginkilala ang biktima kay alyas Milag, 35 anyos samtang ang suspek naman amo si alyas Tito lunsay mga residente sang nasambit nga lugar.
Sa interview sang Bombo Radyo Bacolod kay Police Captain Jesus Alba, Chief of Police sang Calatrava Municipal Police Station, sa imbestigasyon nagluntad ang pagbinaisay sa tunga sang mag-asawa bangud sa naremate nga motorsiklo nga pila na ka bulan nga wala mabayaran.
Suno kay Alba, bangud sa komosyon nagkuha ang suspek sang kutsilyo kag ginbuno ang biktima nga nakaangkon sang pilas sa dughan kag tiyan.
Gindala sa Calatrava Hospital ang biktima apang gindeklarar nga dead on arrival samtang ginrefer naman sa Corazon Montelibano Memorial Regional Hospital sa ciudad sang Bacolod matapos makaangkon ini sang samad matapos nga ginbuno man sini ang iya nga kaugalingon.
Suno sa hepe, ang suspek ang nakainum naman sang makahulubog nga ilimnon antes ang insidente.
Dugang pa ni Alba nga ang suspek ang nadakpan man sang nakaligad nga tuig sa kaso nga paglapas sa RA 9165 ukon Comprehensive Dangerous Drugs Act of 2002 apang nakagwa sa idalom sang plea bargaining.
Kaso nga parricide ang ipasaka batok sa suspetsado.
