Patay ang isa ka call center agent matapos ginbuno sang iya bana nga isa ka foreign national sa ila nga balay sa Villa Mikaela, Alice Street, Barangay Singcang Airport, Bacolod City kaina sang aga.
Bag-o lang nakapauli ang biktima nga si Liezel Demerin St. Jean nagikan sa trabaho pasado alas 6:00 sang aga sang sila ang nagbais sang iya bana nga si Ronald St. Jean, 55-anyos, isa ka Canadian national.
Sa interview sang Bombo Radyo sa hinablos ni Liezel nga si CJ Bryan Mirasol, nagaluto ini sang pamahaw sang nag-abot ang iya 47-anyos tiya.
Nabatian ni CJ nga naglalisay ang mag-asawa apang iya ginpinsar nga normal lamang ini bangud sila ang masami naman nga naga-away.
Nagpaligo si CJ kag nabatian na lamang sini nga nagsinggit si Liezel nga tawgon ang iya nga tiyo nga si Gabby bangud sunugon ni Ronald ang pila ka mga papeles.
Nakita man ni CJ nga may uyat nga kutsilyo ang Canadian national kag ginsakyan sini si Liezel samtang nagahigda sa ila nga hiligdaan.
Suno sa iya, nakit-an mismo sang mga kabataan sang mag-asawa nga 11-anyos kag pito ka tuig ang pagbuno sang ila amay sa ila iloy kag nagdalagan si CJ kag gindala ang mga kabataan sa balay sang ila nga lolo.
Nagpanawag ang mga ini sang bulig sa barangay kag pag-abot sang mga barangay tanod, ila naabtan nga nagahamyangon na si Liezel sa foam sa salog, nakaputos sa habol, duguon kag wala na nagagiho.
Samtang si Ronald naman ang may uyat nga kutsilyo kag may pilas sa pulso matapos sini ginlaslasan ang iya kaugalingon apang nahimo pa sini nga magbato sa mga pulis kag tanod gamit ang tear gas.
Natigayon ini nga nadakpan sang mga otoridad kag gindala sa ospital apang ginbawian ini sang kabuhi.
May ginbilin naman nga envelope nga naga-unod sang mga papeles si Ronald St. Jean sa utod sang iya asawa nga si Gaby antes ini nagbato sa mga otoridad gamit ang tear gas.// Suno kay Gaby, ginhambalan ini ni Ronald nga iya isecure ang mga papeles bangud para ini sa ila mga kabataan.
Pagkatapos sini, gintear gas niya ang mga pulis kag tanod apang gilayon man nga nadakpan.
Suno sa iya, mayuhay sila sang Canadian national apang may batasan ini nga dasig mangakig.
Suno diri, ang trabaho lamang ni Liezel sa karun ang ginakuhaan sang palangabuhian sang pamilya bangud nagahulat pa sang iya pension si Ronald.
Una na nga ginlaragway ni CJ ang foreigner nga maayo sa iban nga tawo apang istrikto ini sa iya mga kabataan kag masami nga nagapanakit.
