Hustisya gihapon ang panawagan sang mga nalisdan nga pamilya sa Degamo Massacre sang Marso 4, 2023.
Nadeport na balik sa Pilipinas ang ginatudlo nga mastermind sa krimen nga si expelled Negros Oriental 3rd District Congressman Arnolfo “Arnie” Teves Jr.
Madumduman nga ginsulod sang mga armado ang compound ni late Negros Orietal Governor Roel Degamo, sa tion nga siya ang nagahatag sang bulig sa pila ka mga constituents.
Ginpaarakan ang mga ini sang luthang nga nagresulta sa kamatayon sang gobernador kag siyam ka iban pa.
Sa interview sang Bombo Radyo Bacolod kay Mylene Gallega, asawa sang driver-security ni Degamo nga isa sa mga napatay nga si Crispine Gallega, nagapabilin gihapon ang kasakit sa iya dughan sa pagpatay sa iya bana.
Ang iya bana ang nakaangkon sang tatlo ka igo sang bala sa lawas, nga gintunaan sang kamatayon sini.
Hugot ini nga nagapati nga si Arnie Teves gid man ang mastermind sa krimen.
Pangabay na lamang sini nga makuha nila ang hustisya karun nga napapauli na ang anay kongresista.
Si Mylene ang may tatlo ka magagmay pa nga kabataan, gani siya ang wala man makatrabaho matapos mapatay ang ila bread winner bangod wala man ini sang mabilinan sang mga bata.
Pahayag sini nga tanan sila nga nalisdan ang nagfile sang kaso upod kay Pamplona Mayor kag Congressional-elect Janice Degamo.
