Naghilibion ang asawa sang 49 anyos nga tricycle driver sa pagkapatay sang iya bana kun sa diin nadulaan sang amay ang siyam nila ka kabataan.
Sa interview sang Bombo Radyo kay Jenebel Bayotas, nagapati siya nga away sa duta ang rason sa pagluthang sa iya bana nga si Roger bangod ang lola sini may yara sang duta nga ginbaligya sang ila tiya.
Apang, luyag na nila kun tani bawion ang sobra sang duta kag amo na nga nagkaproblema ang ila pamilya.
Madumduman nga ang Barangay Kagawad nga si Joe Arnel Gawan nga ginluthang patay sang tinalikdan, amo ang caretaker nga ginkuha para magbantay sa duta nga ginbaligya.
Suno kay Jenebel, ginhambalan sang iya bana si Gawan nga sa papeles lamang sila naga-away apang sa personal, sila ang mag-abyan sa gihapon.
Pahayag ni Jenebel, maayo nga tawo ang iya bana kag wala sang kontra kag dako pa kuntani ang handom sini sa iya mga bata.
Indi sini mabaton nga sa isa lang ka adlaw nadulaan sang amay ang ila siyam ka bata kun sa diin ang mga bata nila nga naga-eskwela pa ang padayon nga nagahulat nga magpauli ang ila amay sa ila balay.
Nagapanawagan ini sa karun sa kun sin-o man ang may ihibalo sa kaso kag nakakilala sa mga suspetsado nga buligan sila agud mahatagan sang hustisya ang iya bana.
