Nagpanindugan ang asawa sang tricycle driver nga napatay kadungan sang ginaalegar engkwentro nga nagluntad sa Purok Lubi, Barangay Tabugon, Kabankalan City kagab-i nga indi miyembro sang New People’s Army ang iya bana nga si Ruben Gaitan.
Sa interview sang Bombo Radyo kay Ariel Gaitan nga residente sang Sitio Lumbia, Barangay Kamansi, Kabankalan City, ang iya bana nga si Ruben ang nagaubra sa construction site sa Southern Negros Development Corporation (SONEDCO) sa Kabankalan.
Sila ang may duha ka mga kabataan nga lunsay mga babayi nga nagaedad sang siyam kag apat ka tuig.
Suno diri, bag-o lang nila nabakal ang tricycle nga yara sa karon sa custody sang Kabankalan City Police Station.
Antes magsulod sa trabaho kun aga suno sa iya, nagapick up sang mga estudyante si Ruben agud nga may dugang nga income kag nagabyahe man sang tricycle kun matapos ang iya duty kun hapon.
Kagab-i, naglisensya si Ruben nga mamasahero apang wala ini nakahibalo kun sanday sin-o ang iya sugaton ukon idul-ong kag nahibaluan niya nalang ang natabo kaina sang aga.
Suno sa misis, wala sang kaangtanan sa rebelde nga grupo ang iya nga bana kundi mahimo nga gin-akupar ang iya nga tricycle bangud indi man ini makapili kun sanday sin-o ang iya pasakyon.
Suno diri, tuman kasakit ang nadangatan ni Ruben kag kuntani gin-usisa anay sang mga suldado ang iya nga bana antes gintiro.
Wala pa sang pamilya sang tatlo ka mga lalaki kag duha ka mga babayi nga nagpadulong sa punerarya agud nga iclaim ang ila bangkay.
Suno naman kay 302nd Infantry Brigade commander Brigadier General Joey Escanillas, igavalidate pa ang pahayag ni Ariel Gaitan nga misis ni Ruben.
Apang ang makaduluda lang suno kay Escanillas bangud nga sa tanan nga tricycle, ang kay Gaitan gid ang sakyan sang mga rebelde.
Suno diri, ang masaligan man nga tawo ang sakyan sang yara sa hublag.
Gin-athag sini nga may apat ka sahi sang NPA nga ginalakipan sang yara sa kabukiran nga nagapangrecruit kag nagaorganize; vertical forces nga nagapangsunog ukon naga-impose sang taxation; militia ng bayan ukon territorial forces; kag ang partisan unit ukon nagatrabaho sa city ukon town centers.
Suno kay Escanillas, ang partisan unit ang indi identified bangud nagapakuno-kuno sila nga ordinary citizens kag ginapatawag lang kun kinahanglan.
Ang NPA suno sa iya ang may yara sang special operations group nga ginapatawag lang kun may operation kaangay sang sunugon ukon patyon, kag nalakip na diri ang Special Partisan Unit.
Suno sa Army official, makaduluda nga yara sa Sitio Lubi si Gaitan nga maligwin ini nga lugar.
