17 ka mga transport routes lamang gikan sa 24 ang natapos nga maapplyan sang “Asenso Bacolod Transport Cooperative” antes nagtakop ang consolidation period kahapon.
Sa interview sang Bombo Radyo Bacolod kay Junjun Asis, Secretary General sa Sentrong Samahan ng mga Tsuper at Operator Negros (SSTONE) sila ang naga-ayo sa Land Transportation Franchising and Regulatory Board (LTFRB) Region 6 nga hatagan pa sang kahigayunan nga matapos ang requirement sang iban pa nga mga operators sang traditional jeepneys nga luyag magsulod sa consolidation.
Nahibaluan nga ang SSTONE kag Federation of Bacolod City Drivers Association (FEBACDA) ang nagtukod ang kooperatiba bilang palaagyan agud makasulod sa consolidation nga amo ang first step sa public utility vehicle (PUV) modernization program.
Apang sa pihak sang pila ka adlaw nga paghingagaw, kun sa diin sila ang naabtan na sang alas-9:00 kagab-i sa pagproseso, madamo gihapon sang mga operators nga wala nakahingagaw.
Aminado si Asis nga mauti ang pagplastar sang mga papelis kag nagatiyog-tiyog pa ang mga ini sa nanarisari nga opisina sa LTFRB Region 6, kag may dugang pa nga requirements pagdangat sa punta.
Suno diri, tuman ka budlay sa ila bangod kinahanglan pa nga magtabok-tabok sa Bacolod City kag Iloilo agud lamang matapos ang proseso.
Suno diri, madamo pagid sang luyag nga makabyahe apang ginkulabos sa oras, gani apisar nga sila ang may certificate of registration pa, indi man gihapon makabyahe sa dalanon bangod wala na sang provisional authority.
Gani panawagan sini nga kuntani sila ang mahatagan pa sang dugang nga duha ka semana agud ini ang macomply.
Sa karun, sa mga main routes pa lamang ang nasecure nila, kag may pito ka routa nga wala pa napasudlan.
Isa man sa ginakahangawa sang mga ini nga kun modernized jeepney na lamang ang magabyahe, wala na sang masakyan ang kaagahon nga nagapangumpra kasubong man ang mga call center agents sa kagab-ihon.
Ini bangod kalabanan sa mga modernized jeepneys ang nagasugod sa byahe alas-7:00 sa aga kag nagagarahe na alas-9:00 sa gab-i.
