Ginalauman nga magakadto ang kapin 30 mil ka supporters sang Team Asenso kag magatambong sa Asenso Night kag pre-birthday celebration ni Bacolod City Mayor Alfredo “Albee” Benitez sa Paglaum Sports Complex sa Disyembre 18, 2024.
Suno kay Atty. Caesar Distrito, spokesperson sang alkalde, magasaulog si Benitez sang iya kaadlawan sa Disyembre 20 kag ini ang idungan sa pagtililipon sang mga supporters sang Team Asenso sa Myerkules kun sa diin may patigayunon nga programa alas-4:00 ang takna sa hapon.
Nalakip sa magatambong ang Purok Officials, Barangay Officials, Family Leaders, kag supporters sang alkalde, kag iban pa.
May patigayunon man nga raffle sa sini nga aktibidad.
May yara man sang mga guest performers agud nga mag-entertain sa mga magatambong sa nasambit nga kahiwatan.
Suno kay Distrito, pagahatagan man sang tion ang team asenso agud nga maggreet sa alkalde apang ini ang tinguhaan nga matapos alas 7:00 ang takna sang gab-i.
Wala man sang impormasyon si Distrito kun may yara sang gin-imbetahan nga national officials.
Samtang bangud sa patigayunon nga programa nagpagwa sang advisory ang Bacolod Traffic Authority Office, nga magapatuman sang road closures sa dalan Hernaez kag Lacson sa Paglaum ala-1:00 tubtob alas-5:00 ang takna sang hapon, samtang magasira ang dalan Lizares alas-2:00 ang takna sang hapon tubtob alas-10:00 ang takna sang gab-i.
