Naka-abot na ang African Swine Fever (ASF) test kits sa ciudad sang Bacolod.
Madumduman nga may duha ka baboy sa barangay Alijis kag duha man ka baboy sa barangay Taculing ang nagpositibo sa ASF.
Suno kay Bacolod City Administrator Atty Mark Steven Mayo, nagkoordirnar na sila sa City Veterinary Office para mapatuman ang inspection kag testing sa mga barangay sa ciudad.
Suno diri, lima ka box sang test kit ang ginprocure sang ciudad kun sa diin ang kada box naga-unod sang 96 ka test kit kag ang kada box nagabalor sang P85,000.
Suno kay Mayo, ang test kit may shelf life nga 21 months kag ini magamit tubtob pa sa tuig 2028 basta nasafe keep sa cold storage.
Dugang pa sini, mahimo pa nga madugangan ang test kit depende sa rekomendasyon sang City Veterinary Office.
Pahayag ni Mayo, nag-umpisa na ang surveillance sa ciudad kag bangod naka-abot na kahapon ang test kit mahimo na gilayon nga maka-umpisa sa random testing.
Samtang, ginfinalize pa sang City Veterinary Office, Bacolod City Police Office kag Bacolod Traffic and Transport Management Department (BTTMD) ang deployment plan sang mga personnel sa border checkpoint.
