Temporaryo nga wala ginpaduty ang 18 ka empleyado sang Rafael Salas Park and Nature Center sa Sitio Guintubdan, Barangay Ilijan, Bago City bangod sa baho sang asupre kag ashfall gikan sa bulkan Kanlaon.
Suno kay City Disaster Risk Reduction and Management Office Head Dr. Mary Jane Ortizo, sang Lunes nabatyagan ang baho sang asupre kag ini ang liwat nga nabatyagan kahapon kaupod ang ashfall.
Suno diri, naabisohan na ang mga empleyado nga magsuksok sang facemask apang ginpakamaayo na lamang sa karun nga temporaryo nga indi anay mag-duty ang mga personnel.
Kahapon, 14 ka mga volcanic earthquakes kag duha ka ashing events ang narekord sa bulkan.
Santo sa monitoring sang Philippine Institute of Volcanology and Seismology (PHIVOLCS).
Nagdangat sa 4900 tonnes per day nga sulfur dioxide ang ginbuga sang bulkan kun sa diin naglab-ot sa 750 meters ang kataason sang volcanic plume padulong sa naaminhan-nasidlangan nga dereksyon.
Tubtob sa karun wala sa gihapon ginpahanugotan ang pagsulod sa 4 km radius Permanent Danger Zone kag pagbyahe sang bisan ano nga aircraft malapit sa ibabaw sang bulkan.
Ginapaandaman man ang publiko sa posible nga pagluntad sang gulpyada nga paglupok sang steam ukon phreatic explosions.
