Ginpasalig sang Philippine Institute of Volcanology and Seismology (Phivolcs) nga wala untat ang monitoring sa Bulkan Kanlaon apang indi lamang matumod ang eksakto nga oras nga magalupok ang bulkan.
Kahapon nagbisita diri sa probinsya si Maria Antonia Bornas, Chief Science Research Specialist sang Volcano Monitoring and Eruption Prediction Division kaupod si Phivolcs Director Teresito Bacolcol.
Suno kay Bornas, indi matuod nga wala nagamonitor ang Phivolcs, bangod sa ila nga data humalin pa sang tuig 2020 may yara na sang namonitor nga mahinay nga inflation sa duta kag pagbuga sang aso sa bulkan apang, indi lamang ma-detect ang exact nga oras kun san-o magalupok ang bulkan.
Dugang pa sini sang Hunyo 3, alas- 6:47 sang gab-i may namonitor nga volcanic earthquake kag alas- 6:51 amo na nga naglupok ang bulkan.
Suno diri, sa karun may yara pa sang ginabuga nga sulfur ang bulkan kag may yara pa sang tremor nga namonitor amo nga wala sa gihapon ginapahanugotan ang pagbalik sang mga evacuees kag pagsulod sa 4km permanent danger zone.
Nagnubo man ang takos sang ginabuga nga aso sang bulkan, apang paathag ni Bornas indi ini basehan nga mahambal nga nagkalma na ang bulkan kag indi na delikado.
Nagapabiln sa gihapon sa alert level 2 ang bulkan, samtang indi manaog ang gas emission kag volcanic earthquake nga mamonitor.
Pahayag ni Bornas, apisar nga isa na ka semana ang naglabay matapos nga naglupok ang bulkan, nagakinahanglan ini sa gihapon sang malawig nga obserbsayon.
