Nagdangat sa masobra P1.9 million ang narecover nga suspected shabu sa tatlo ka asod-asod nga drug buybust operation sa Bacolod City kagab-i tubtob kaina sang kaagahon.
Ini pinaagi sa ginpasanyog pa nga anti-illegal drugs operation sang Bacolod City Police Office.
Una nga naaresto alas-6:37 kagab-i sanday Alyas Yanyan, 29 anyos, babayi kag Alyas Benjie, 38 anyos, lalaki sa buybust operation nga ginpatigayon sa Barangay Vista Alegre.
Narecover sa duha ang ginabanta nagabug-at sang 11 ka gramos sang suspected shabu nga nagabalor P74,800.
Nagdangat naman sa P1,360,000 ang balor sang suspected shabu sa drug buybust operation sang Bacolod Police Station 2 nga ginpatigayon sa Purok Lampirong, Barangay 2, ala-1:30 kaina sang kaagahon.
Arestado si Alyas Alfie, 40 anyos, residente sang Barangay Mansilingan.
Samtang sunod naman nga nadakpan ang 21 anyos nga si Siegfred Caseño Alyas Koi, sa drug buybust operation sa Purok Saturn, Brgy Handumanan kaina ala-1:34 kaina sang kaagahon.
Ang operasyon ang ginpatigayon sang City Drug Enfocement Unit (CDEU) kun sa diin ila nakumpirkar ang anom ka sachet kag isa ka knot-tied plastic bag sang suspected shabu nga ginabanta nagabug-at sang 70 gramos kag may balor nga P476,000.
Sa kabug-usan nagdangat sa 281 gramos ang narecover nga suspected shabu nga may standard drug price nga P1,910,800.
Ang mga suspect ang mangatubang sang kaso sa paglapas sa Republic Act 9165 ukon Comprehensive Dangerous Drugs Act of 2002.
